# Кабинетке кіре алмай жатырмын

> Кабинетке пароль жоқ, кіру нөмір арқылы. Ең жиі қате — кассир нөмірімен кіруге тырысу. Код келмесе не істеу керек және кабинет неге бос болып көрінеді.

## Қысқаша

Кабинетке **өз жеке нөміріңізбен** кіресіз — Kaspi-ге қосқан кассир нөмірімен емес. Бұл ең жиі кездесетін қате. Пароль жоқ: нөміріңізді енгізесіз де, кодты WhatsApp, Telegram немесе SMS арқылы аласыз. Код келмесе, басқа арнаны таңдап көріңіз. Кірдіңіз, бірақ кабинет бос болып тұрса — ұйым таңдалмаған немесе сізге жіберілген шақыру әлі қабылданбаған.

## Үш нөмірді шатастырмаңыз

Бұл бөлімді ең алдымен оқыңыз — мәселенің көбі осы жерден шығады.

| Нөмір | Не үшін | Қайда енгізіледі |
|---|---|---|
| **Жеке нөміріңіз** | Кабинетке кіру | [qut.kz/app](https://qut.kz/app) кіру бетінде |
| **Кассир нөмірі** | Kaspi-де счёт шығару | Кабинет → Kaspi → байланыс картасында |
| **Клиент нөмірі** | Клиентке счёт жіберу | Счёт жасағанда, `customer.phone` өрісінде |

Кассир нөмірімен кабинетке кіруге тырысудың нәтижесі: сол нөмір аккаунтқа тіркелмеген болса, код келмейді немесе жаңа бос аккаунт ашылып қалады. Кассир нөмірі — Kaspi-дегі жұмыс нөмірі, кабинеттің логині емес.

Оның үстіне **кассир нөмірімен Kaspi Pay қосымшасына кірмеу керек**: Kaspi бір нөмірге бір ғана белсенді құрылғыға рұқсат береді, сондықтан біздің байланыс үзіліп қалады.

## Симптом бойынша

| Не болып жатыр | Ықтимал себебі | Не істеу керек |
|---|---|---|
| Код мүлде келмейді | Арна қолжетімсіз немесе нөмір қате | Басқа арнаны таңдаңыз, нөмірді тексеріңіз |
| «Код дұрыс емес» (`invalid_code`) | Қате терілген немесе ескі код | Соңғы келген кодты қолданыңыз |
| «Кодтың мерзімі өтті» (`challenge_expired`) | Код ескірген | Жаңа код сұраңыз |
| «Код пайдаланылған» (`challenge_used`) | Бір код екі рет енгізілген | Жаңа код сұраңыз |
| «Тым көп әрекет» (`too_many_attempts`) | Жиілік шектеуі | Бір минут күтіңіз |
| «Арна жоқ» (`no_channel`) | Код жіберетін жол табылмады | Қолдауға жазыңыз |
| Кірдім, бірақ кабинет бос | Ұйым таңдалмаған немесе шақыру қабылданбаған | Төмендегі бөлімді қараңыз |

## Код келмесе

**1. Арнаны ауыстырыңыз.** Кабинет кодты бірнеше жолмен жібере алады: WhatsApp батырмасы немесе коды, Telegram, SMS. Бірі істемей тұрса, екіншісін таңдаңыз. Көбіне мәселе нақты бір арнада болады, аккаунтта емес.

**2. Нөмір пішімін тексеріңіз.** Нөмірді `7XXXXXXXXXX` түрінде, 11 санмен енгізіңіз. `8`-ден бастамаңыз, бос орын, жақша, сызықша қоймаңыз.

**3. Телефонды тексеріңіз.** SMS-тің «Спам» немесе «Белгісіз жіберушілер» бөліміне түсуі жиі кездеседі. WhatsApp немесе Telegram таңдасаңыз, интернет қосулы болуы керек.

**4. Жиілік шектеуіне тірелмеңіз.** Кодты қайта-қайта сұрай берсеңіз, уақытша бөгет қойылады. Бір минут күтіп, содан кейін бір-ақ рет сұраңыз.

**5. Кодты асықпай енгізіңіз.** Код қысқа уақытқа ғана жарамды. Соңғы келгенін қолданыңыз: бірнеше код сұрасаңыз, ескілері жарамсыз болады.

SMS-тің келмеу себептері толығырақ: [Kaspi SMS коды келмейді](/kb/sms-not-arriving). Ондағы себептердің бір бөлігі кабинетке кіру кодына да қатысты.

## Кірдім, бірақ кабинет бос

Бұл әдетте қате емес. Екі жағдай болуы мүмкін.

**Ұйым таңдалмаған.** Бір аккаунтта бірнеше ұйым болса, жоғарғы жақтағы ауыстырғыштан керектісін таңдау керек. Басқа ұйымның счёттары ағымдағы ұйымда көрінбейді.

**Шақыру қабылданбаған.** Әріптесіңіз сізді кабинетке шақырса, шақыруды қабылдағанша сіз ол ұйымның деректерін көрмейсіз. Шақыру дәл сол нөмірге жіберілуі керек — басқа нөмірмен кірсеңіз, ол ұйым тізімде болмайды.

**Рөліңіз шектеулі болуы да мүмкін.** Кабинетте үш рөл бар: owner (иесі), manager, developer. Рөліңізге ашық емес бөлімдер мәзірде көрінбейді. Бөлім жоқ болып тұрса, ұйым иесінен рөліңізді нақтылаңыз.

## Аккаунтқа кіру жолы жоғалса

- **Нөмірді ауыстырдыңыз.** Ескі SIM қолыңызда болса, кіріп, баптаудан нөмірді жаңартыңыз. Ескі нөмірге қолжетімділік жоқ болса, қолдауға жазыңыз.
- **Ұйымның жалғыз иесі кетіп қалды.** Мұны өз бетінше шешу мүмкін емес, қолдауға жазыңыз.
- **Аккаунт бөгелген** (`account_blocked`) немесе **ұйым архивте** (`organization_inactive`). Бұларды да қолдау шешеді.

Қолдау: WhatsApp +7 778 881 3333, Telegram [@qutpaybot](https://t.me/qutpaybot), email kazprose@gmail.com. Жазғанда нөміріңізді және ұйымның атауын көрсетіңіз — іздеу жылдамдайды.

## Жиі қойылатын сұрақтар

**Пароль қоюға бола ма?** Жоқ. Кіру тек нөмір мен бір реттік код арқылы.

**Екі адам бір аккаунтқа кіре ала ма?** Бір нөмірді бөліспеңіз. Әрқайсысына өз нөмірімен шақыру жіберіңіз — кім не істегені де сонда көрініп тұрады.

**Кабинетке кірсем, кассир байланысы үзіле ме?** Жоқ. Байланыс кассир нөмірімен Kaspi Pay қосымшасына кіргенде үзіледі, кабинетке кіру оған әсер етпейді.

**Телефонымды жоғалттым, нөмірім сол.** Жаңа телефонға сол SIM-ді салсаңыз, кіру жұмысын жалғастырады. Құрылғының өзі маңызды емес.

**Кассир нөміріне кабинетке кіру құқығын беруге бола ма?** Кассир нөмірін тек Kaspi үшін бөлек ұстаған дұрыс: [Кассир нөміріне қойылатын үш шарт](/kb/cashier-number-requirements).