# Фискалды чек: кім жауапты және қашан автоматты шығады

> Kaspi QR арқылы төлемде чекті көбіне Kaspi өзі шығарады. Қолма-қол ақша мен басқа банктің POS-ы автоматты чек жасамайды. Кім жауапты, ОФД қайда, біздің чек бетінен айырмашылығы.

## Қысқаша

Kaspi арқылы төлем қабылдасаңыз, **фискалды чек міндетті**. Бірақ Kaspi Касса қосулы болса, қашықтан төлемде (Qut Pay арқылы шығарған счёт, сілтеме, телефонға счёт) чекті **Kaspi өзі шығарады** және клиенттің Kaspi қосымшасына жібереді — сізден бөлек әрекет талап етілмейді.

Чек беру міндеті — **сатушыда**, төлем сервисінде емес. Qut Pay ақшаны ұстамайды, сондықтан сіздің атыңыздан фискалды чек бере алмайды.

Қолма-қол ақша, басқа банктің POS-ы немесе басқа банк қосымшасының QR-ы бойынша чек **автоматты жасалмайды** — оны Kaspi қосымшасында қолмен жасайсыз.

## Заң не дейді

Ережелер 2026 жылғы 1 қаңтардан күшіне енген Салық кодексінде (№ 214-VIII), ККМ-ге қатысты 110 және 111-баптарда. Чектің міндетті реквизиттері Қаржы министрлігінің № 626 бұйрығында.

Маңызды айырмашылық:

| Төлем түрі | Фискалды чек керек пе |
|---|---|
| Kaspi QR, телефонға счёт, карта, мобильді төлем | **Иә** |
| Банк шотына тікелей аударым (төлем тапсырмасы) | Жоқ |

Айыппұл: бірінші рет ескерту, жыл ішінде қайталанса шағын бизнеске 20-дан 40 АЕК-ке дейін. 2026 жылғы АЕК — 4 325 ₸, яғни шамамен 86 500-ден 173 000 теңгеге дейін.

## Ең оңай жол: Kaspi Касса

Kaspi Pay бизнес-аккаунтында **Kaspi Касса** деген қызмет бар. Kaspi өз гидінде оның қосылуын да, қызмет көрсетуін де тегін деп көрсетеді. Қосылған соң ол Kaspi ОФД-да автоматты тіркеледі және Мемлекеттік кірістер комитетінде есепке қойылады — бөлек тіркеудің қажеті жоқ.

Ең бастысы: **қашықтан төлемде чек автоматты жасалады** және клиентке Kaspi қосымшасының «Хабарламалар» бөліміне жіберіледі. Яғни Qut Pay арқылы шығарған счётыңыз төленгенде чек өзі кетеді.

| Төлем қалай өтті | Чек |
|---|---|
| Kaspi Gold, Kaspi Red, Kaspi Kredit | Автоматты |
| Kaspi Pay шоты арқылы төлеу | Автоматты |
| Қашықтан төлем (сілтеме, телефонға счёт, QR) | Автоматты |
| Kaspi.kz дүкеніндегі тапсырыс | Автоматты |
| Қолма-қол ақша | Қолмен |
| Басқа банктің POS-ы немесе QR-ы | Қолмен |

Қолмен жасау: Kaspi қосымшасында «Чекті клиентке жіберу» батырмасын басасыз.

### Қалай қосу керек

Kaspi Pay қосымшасы → Kaspi Касса → қосу. Толық нұсқаулық Kaspi гидінде: [guide.kaspi.kz](https://guide.kaspi.kz/partner/ru/cashier/payments).

Қосылмауы мүмкін жағдайлар:

- сіз Kaspi Pay-де қосымша пайдаланушысыз — Kaspi Кассаны тек басшы, басқарушы немесе бухгалтер қоса алады;
- Kaspi Pay-де сату нүктеңіз жоқ;
- ЖК сенімхат бойынша ашылған, бірақ сіз Kaspi Pay-де басшы болып тағайындалмағансыз.

Осылардың біріне тап болсаңыз, Kaspi қолдауына жазыңыз — әр жағдай жеке қаралады.

## Kaspi Кассаны қоса алмасаңыз

Онда бөлек бұлттық касса керек: Webkassa, re:Kassa және басқалары. Шартты өзіңіз жасайсыз, айлық ақысы шамамен 1 200-ден 3 000 теңгеге дейін. Ондай касса да ОФД арқылы жұмыс істейді және Мемлекеттік кірістер комитетінде тіркеледі.

Мұндай жағдайда бізге жазыңыз: сіздің касса аккаунтыңыздың кілтімен чекті автоматты соғатын интеграцияны жоспарлап отырмыз. Ол әдепкіде **өшірулі** болады — себебі келесі бөлімде.

## Неге біз әдепкіде чек соқпаймыз

Егер сізде Kaspi Касса қосулы болса, Kaspi чекті өзі шығарады. Біз үстінен тағы соқсақ, **бір төлемге екі фискалды чек** кетеді. Одан шығатын зиян нақты:

- айналым жасанды өседі;
- ҚҚС пен арнайы салық режимінің шектеріне уақытынан бұрын жетесіз;
- декларацияда нақты түсіммен алшақтық пайда болады.

Kaspi Кассаның қосулы-қосулы емесін бізге API арқылы білу мүмкіндігі жоқ. Сондықтан бұл сұрақтың жауабы сізде: кабинетте **Баптау** бөлімінде Kaspi Касса күйін өзіңіз белгілейсіз.

## Біздің чек беті — фискалды чек емес

Счёт төленгенде Qut Pay әр төлемге өз чек бетін жасайды: `https://api.qut.kz/receipt/<счёт идентификаторы>`. Онда дүкен атауы, заңды деректер, күні, қызмет атауы, тапсырыс нөмірі, сомасы және чектің реттік нөмірі көрінеді.

Бұл бет — **төлем туралы растама**, ККМ чегі емес. Оны:

- клиентке «төлем өтті» дегеннің дәлелі ретінде беруге болады;
- өз есебіңізде ыңғайлы сілтеме ретінде пайдалануға болады;
- **фискалды чектің орнына салық органына ұсынуға болмайды**.

Екеуін шатастырмаңыз: фискалды чек ОФД арқылы өтеді, сіздің ККМ-іңіздің деректемелері болады. Біздің чек бетінде ол деректемелер жоқ. Толығы: [Чектер және оларды клиентке жеткізу](/kb/receipts).

## Не істеу керек, қысқаша

1. Kaspi Pay қосымшасынан **Kaspi Кассаны қосыңыз**.
2. Кабинет → **Баптау** → фискалды чек бөлімінде оны қосқаныңызды белгілеңіз.
3. Ұйым деректеріңіз толық екенін тексеріңіз: [Ұйым деректерін толтыру](/kb/org-settings).
4. Бір нақты төлем жасап, клиентке чек келгенін өз көзіңізбен көріңіз.
5. Қоса алмасаңыз, бізге жазыңыз — бөлек касса нұсқасын қараймыз.

## Жиі қойылатын сұрақтар

**Qut Pay арқылы төлем қабылдасам, чек өзі кете ме?** Kaspi Касса қосулы болса — иә, Kaspi оны қашықтан төлем ретінде өңдеп, чекті клиенттің қосымшасына жібереді. Қосылмаған болса — жоқ, чек шықпайды.

**Sandbox счёттарына чек шыға ма?** Жоқ. Sandbox-та нақты ақша жүрмейді, Kaspi мүлде шақырылмайды. Біздің чек беті сандбокста жасалуы мүмкін, бірақ онда `SANDBOX` белгісі тұрады.

**Клиент чекті таппай жатыр.** Ол Kaspi қосымшасының «Хабарламалар» бөлімінде. Сіздің төлем растамаңыз бөлек — оның сілтемесін өзіңіз жібере аласыз.

**Екі касса қатар жұмыс істей ме?** Техникалық жағынан — иә, бірақ ол бір төлемге екі чек беріп, есебіңізді бұзады. Біреуін ғана қалдырыңыз.

**Бұл бет салықтық кеңес пе?** Жоқ. Бет ақпараттық сипатта. Күмәнді жағдайда бухгалтеріңізбен немесе Мемлекеттік кірістер комитетімен нақтылаңыз. Сұрағыңыз бізге қатысты болса: [Қолдауға қалай жазу керек](/kb/support-how).