# Сынақ мерзімі: қанша және не кіреді

> Сынақ — 7 күн, тәулігіне 50 счёт. Ең бастысы: ол тіркелген күннен емес, бірінші нақты счёттан басталады. Сондықтан асықпай дайындалып, сосын бастауға болады.

## Қысқаша

Сынақ мерзімі — **7 күн, тәулігіне 50 счётқа дейін**. Ол тіркелген күннен емес, **бірінші нақты (live) счёттан** басталады. Sandbox-тағы счёттар санақты бастамайды әрі мөлшермен шектелмейді. Яғни тіркеліп, sandbox-та интеграцияңызды толық жинап, жұмыс істейтініне көз жеткізіп барып қана сынақ күндерін жұмсай бастайсыз.

## Сынақ қашан басталады

| Не істедіңіз | Сынақ басталды ма |
|---|---|
| Тіркелдіңіз, кабинетке кірдіңіз | Жоқ |
| Kaspi кассирін қостыңыз | Жоқ |
| API кілт жасадыңыз, webhook қойдыңыз | Жоқ |
| Sandbox-та ондаған счёт жасап сынадыңыз | Жоқ |
| **Live режимде бірінші счётты жасадыңыз** | **Иә, сол сәттен 7 күн** |

Санақ счёт **жасалған** сәттен басталады, төленген сәттен емес. Бірінші live счёт төленбей қалса да күндер жүре береді.

Кабинеттің **Тариф** бөлімінде қолданыстағы тариф, қалған күн саны және «Осы айда: n / m» есебі көрінеді.

## Сынаққа не кіреді

Функциялар бойынша шектеу жоқ — сынақта бәрі ашық:

- QR счёт және телефонға счёт (клиенттің Kaspi қосымшасына)
- Кабинеттен қолмен счёт шығару және топтап (CSV) жасау
- Тұрақты төлем сілтемелері мен статикалық QR, ашық сомалы да
- Жазылымдар — счётты кестеге сай шығару
- Webhook, оның журналы мен қайта жіберуі
- Толық және ішінара қайтару
- Telegram бот, форма-хуктар, WooCommerce және OpenCart модульдері, SDK-лар
- Sandbox режимі

Жалғыз шектеу — сан: **тәулігіне 50 live счёт**. Sandbox счёттары бұл санға кірмейді.

## Тәуліктік 50 — не үшін

Бұл бизнес лимиті емес, циклге түсіп кеткен интеграциядан қорғаныс. Дұрыс жазылмаған код бір түнде мыңдаған счёт шығарып, клиенттеріңізге қоқыс жіберіп үлгереді — сол болмасын деген шек.

Оған тірелсеңіз API `tariff_daily_burst` қатесін қайтарады. Бұл айлық лимиттің (`tariff_limit_reached`) қатесі емес, екеуі екі басқа нәрсе.

## Сынақты бастар алдында не істеу керек

Күндерді бос жібермеу үшін мына реттілік ұтымды:

1. Кабинетке кіресіз, ұйым деректерін толтырасыз
2. Kaspi кассирін қосасыз — ол сынақты бастамайды
3. Sandbox кілтімен (`qp_test_…`) интеграцияны жазасыз
4. Sandbox-та счёт жасап, төлемді симуляциялап, webhook-тың келгенін тексересіз
5. Бәрі жұмыс істегенде live режимге ауысып, бірінші нақты счётты жасайсыз — сынақ осы сәттен басталады

Sandbox-та қанша уақыт отырсаңыз да, қанша счёт жасасаңыз да сынақ мерзіміне әсер етпейді.

Бірінші счётты қалай жасау керегі: [Бірінші счётты қалай жасау керек](/kb/first-invoice).

## Сынақ біткенде не болады

- Кабинеттің **Тариф** бөлімінде тариф «мерзімі өткен» болып көрінеді
- Жаңа live счёт жасау тоқтайды
- Кабинет, счёттар тарихы, API кілттер, webhook баптаулары, Kaspi байланысы — бәрі орнында қалады, ештеңе жойылмайды
- Бұрын төленген счёттар мен ақшаға еш әсері жоқ, ақша бәрібір тіке Kaspi шотыңызға түскен
- Sandbox бұрынғыдай жұмыс істей береді

Жалғастыру үшін кабинеттің **Тариф** бөлімінен тариф таңдап, төлейсіз. Төлем өткен соң бірден жалғасады, қайта баптаудың, кілт ауыстырудың қажеті жоқ.

Тарифтер: Бастау — 4 990 ₸, айына 800 счёт. Бизнес — 14 900 ₸, айына 4 000 счёт. Про — 39 900 ₸, айына 15 000 счёт.

## Жиі қойылатын сұрақтар

**Сынақ ақылы ма?** Жоқ, тегін. Карта деректері сұралмайды.

**7 күн жетпей қалса не істеймін?** Тарифті кез келген сәтте төлеп жалғастыруға болады. Ерекше жағдай болса қолдауға жазыңыз: WhatsApp +7 778 881 3333 немесе Telegram @qutpaybot.

**Тіркелгеніме бір ай болды, әлі live счёт жасаған жоқпын. Сынағым жанып кетті ме?** Жоқ. Санақ бірінші live счёттан басталады, ол әлі басталмаған.

**Sandbox-тағы счёттар лимитке кіре ме?** Жоқ. Ол счёттар тәуліктік те, айлық та лимитке кірмейді және сынақты бастамайды.

**Сынақ кезінде ақша қайда түседі?** Әдеттегідей — тіке сіздің Kaspi шотыңызға. Live счёт — нақты счёт, нақты ақша. Сынақ дегеніміз тек бізге төлемнің әлі басталмағаны.

**Тәулігіне 50-ден көп счёт керек болса?** Тарифке көшесіз: Бастау тарифінде тәуліктік қорғаныс 200, Бизнесте 1 500, Про тарифінде 5 000.