Қысқаша
Бір аккаунтта бірнеше ұйым болуы қалыпты жағдай. Кабинетке бір рет кіресіз де, жоғарғы жақтағы ауыстырғыштан қай ұйыммен жұмыс істейтініңізді таңдайсыз. Ұйымдар бір-бірінен толық бөлек: әрқайсысының өз Kaspi кассирі, өз API кілттері, өз webhook адрестері, өз счёттары және өз тарифі бар. Тарифтер қосылмайды — әр ұйым өз тарифін өзі төлейді, лимиттері де бөлек.
Не бөлек, не ортақ
| Не | Ұйымдар арасында |
|---|---|
| Kaspi кассирлері мен байланыстары | Бөлек |
| API кілттері | Бөлек, бір ұйымның кілті екіншісін көрмейді |
| Webhook адрестері мен құпиялары | Бөлек |
| Счёттар, жазылымдар, төлем сілтемелері | Бөлек |
| Тариф, айлық лимит, тәуліктік қорғаныс | Бөлек |
| Қызметкерлер мен рөлдер | Бөлек, әр ұйымға өз тізімі |
| Telegram чаттары мен хабарламалар | Бөлек |
| Сіздің жеке аккаунтыңыз (кіру нөміріңіз) | Ортақ — бір нөмірмен бәріне кіресіз |
Практикада бұл дегеніміз: бір ұйымның кілтімен екінші ұйымның счётын сұрасаңыз, жауап 404 болады, ал кейбір жағдайда 403. Бұл қате емес, қауіпсіздік шекарасы.
Кабинетте ұйым ауыстыру
Кабинеттің жоғарғы жағында ағымдағы ұйымның аты тұрады. Соны басып, тізімнен екіншісін таңдайсыз. Ауысқан соң барлық бөлім — Шолу, Счёттар, Kaspi, Интеграциялар, Тариф — сол ұйымның деректерін көрсетеді.
Жиі кездесетін шатасу: адам бірінші ұйымда тұрып, екінші ұйымның кілтін іздейді де, «кілтім жоғалып кетті» деп ойлайды. Алдымен қай ұйымда тұрғаныңызды тексеріңіз.
Жаңа ұйым қосу да сол ауыстырғыштан жасалады. Жаңа ұйым бос күйде ашылады: кассирі жоқ, кілті жоқ, тарифі сынақ күйінде.
Қашан бөлек ұйым керек
Бөлек ұйым — ауыр құрал. Ол керек болатын нақты жағдайлар:
- Kaspi Pay аккаунттары бөлек. Екі бөлек ЖК немесе ЖШС, ақшасы екі бөлек шотқа түсуі керек. Бұл — бөлек ұйым керек болатын басты себеп.
- Заңды деректер бөлек. Чекте, есепте басқа атау мен басқа деректер көрінуі керек.
- Есеп толық бөлек жүреді. Екі бизнестің бухгалтериясы бір-бірін көрмеуі керек.
- Қызметкерлер бір-бірінің деректерін көрмеуі керек. Бір ұйымның менеджері екінші ұйымның счёттарын мүлде көрмейді.
- Серіктес ретінде клиенттерге ұйым ашасыз. Ол жағдайда әр клиент — бөлек ұйым, толығырақ Partner API.
Қашан бөлек кілт жетеді
Көп жағдайда бөлек ұйымның қажеті жоқ, бөлек API кілт жеткілікті:
| Мақсат | Шешімі |
|---|---|
| Екі дүкеннің есебін бөлу | Бір ұйым, екі кассир, әрқайсысына байланған кілт |
| Сайт пен Telegram ботын бөлу | Бір ұйым, екі кілт, әрқайсысына өз scope-ы |
| Әзірлеушіге шектеулі рұқсат беру | Бір ұйым, бөлек кілт және developer рөлі |
| Тестті өнімнен бөлу | Бір ұйым, sandbox режимі мен qp_test_ кілті |
| Нүктелер бойынша есеп | Бір ұйым, бөлек есеп |
Ереже қарапайым: ақша бір Kaspi шотына түсетін болса — бір ұйым жеткілікті. Ақша бөлек шотқа түсуі керек болса — бөлек ұйым.
Тарифтер қосылмайды
Бұл ең жиі қойылатын сұрақ. Әр ұйымның тарифі өз алдына:
- Бір ұйымда «Бизнес» тарифі болса, екінші ұйым одан ештеңе алмайды
- Бірінші ұйымның қалған лимиті екіншісіне ауыспайды
- Әр ұйымның сынақ мерзімі өз бетінше есептеледі: 7 күн, бірінші нақты счёттан бастап
- Төлем де әр ұйым бойынша бөлек жүреді, Тариф бөлімінен
Сондықтан төрт кішкентай бизнесіңіз болса, тарифті таңдағанда алдымен оларды шынымен бөлу керек пе екенін ойлаңыз: төрт «Бастау» тарифінен гөрі бір «Бизнес» тарифі арзан әрі оңай болуы мүмкін. Есептеу: Қай тарифті таңдау керек.
Қызметкерлер мен рөлдер
Рөлдер әр ұйымға бөлек беріледі. Бір адам бір ұйымда иесі (owner), екіншісінде тек менеджер бола алады — бұл қалыпты жағдай.
Мысалы, бухгалтерді екі ұйымға да менеджер етіп шақырсаңыз, ол екеуінің де счёттарын көреді, бірақ кілттерге де, кассирге де тимейді. Толығырақ: Қызметкерге кабинетке рұқсат беру.
Жиі қойылатын сұрақтар
Қанша ұйым ашуға болады? Шектеу қойылмаған. Бірақ әрқайсысы өз тарифін талап етеді, сондықтан шынымен қажет болғанда ғана ашыңыз.
Бір Kaspi кассирін екі ұйымға қосуға бола ма? Жоқ. Бір нөмір — бір байланыс, бір ұйымда. Сонымен қатар кассир алғаш байланысқан Kaspi ұйымына бекітіледі.
Бір API кілт екі ұйымда жұмыс істей ме? Жоқ. Кілт бір ұйымға тиесілі. Екінші ұйымға бөлек кілт жасайсыз.
Webhook адресім бір — екі ұйымға да сол адресті қоюға бола ма? Иә, болады. Бірақ құпиясы екі ұйымда екі бөлек болады, сондықтан қолтаңбаны тексергенде қай ұйымның оқиғасы екенін ажырата білуіңіз керек.
Ұйымдардың есебін бір жерде көру мүмкін бе? Кабинетте әр ұйым бөлек көрінеді. Біріктірілген есеп керек болса, әр ұйымнан CSV экспортын алып, өз жағыңызда біріктіресіз.