Қысқаша
Кабинетке қызметкерді нөмірі арқылы шақырасыз: кабинет → Баптау → қызметкерлер тізімі → нөмірді енгізіп, рөлін таңдайсыз. Пароль жоқ, ол адам өз нөмірімен кіреді. Үш рөл бар: manager (күнделікті жұмыс), developer (интеграция мен баптау), owner (бәрі, оның ішінде ақша мен кассир). Шақыру мен рөл ауыстыруды тек owner жасай алады, ал ұйымда кемінде бір owner қалуы міндетті.
Үш рөл
Рөлдер бір-бірінің үстіне жиналады: developer — manager істейтіннің бәрін істейді, owner — developer істейтіннің бәрін істейді.
| Бөлім | manager | developer | owner |
|---|---|---|---|
| Шолу, статистика | көреді | көреді | көреді |
| Счёттар: тізім, жасау, болдырмау | иә | иә | иә |
| Счёт бойынша қайтару | жоқ | иә | иә |
| Жазылымдар | иә | иә | иә |
| Топтап счёт жасау | иә | иә | иә |
| Төлем сілтемелері | тек көреді | жасайды, өзгертеді | жасайды, өзгертеді |
| Kaspi кассирлері | тек көреді | тек көреді | қосады, ауыстырады, ажыратады |
| API кілттер | көрмейді | толық | толық |
| Webhook адрестері мен журналы | көрмейді | толық | толық |
| Ұйым баптаулары, sandbox / live режимі | жоқ | иә | иә |
| Telegram чаттарын байланыстыру | тек көреді | иә | иә |
| Тарифті көру | иә | иә | иә |
| Тарифті төлеу, заңды деректер | жоқ | жоқ | иә |
| Қызметкерлер тізімін көру | иә | иә | иә |
| Қызметкер шақыру, рөл ауыстыру, жою | жоқ | жоқ | иә |
| Әрекеттер журналы (audit) | жоқ | жоқ | иә |
| Қолдауға жазу | иә | иә | иә |
Қысқаша қорытындысы:
- manager — сатушы, администратор, бухгалтер. Счёт шығарады, күйін көреді, есеп алады. Кілттерге де, кассирге де тимейді.
- developer — әзірлеуші немесе интегратор. Кілт жасайды, webhook баптайды, журналды оқиды, режимді ауыстырады, қайтару жасайды. Ақшаға және командаға қатысты шешім қабылдамайды.
- owner — ұйым иесі. Бәрін істейді: кассир қосады, тариф төлейді, қызметкерлерді басқарады.
Ең аз құқық принципін ұстаныңыз: адамға жұмысына керегінен артық рөл бермеңіз. Бухгалтерге developer керек емес, әзірлеушіге owner керек емес.
Қызметкерді шақыру
- Кабинеттің Баптау бөліміне барасыз, қызметкерлер тізімін ашасыз
- Қосу дейсіз
- Нөмірін
7XXXXXXXXXXпішімінде енгізесіз, қаласаңыз атын жазасыз - Рөлін таңдайсыз (әдепкісі — manager)
- Сақтайсыз
Ол адамда Qut Pay аккаунты жоқ болса, аккаунт сол сәтте автоматты ашылады. Ол кабинетке өз нөмірімен кіреді — WhatsApp, Telegram немесе SMS коды арқылы. Пароль ойлап табудың қажеті жоқ.
Маңызды: бұл — ол адамның жеке нөмірі, кабинетке кіретін нөмір. Kaspi кассирінің нөмірі емес. Екеуін шатастырмаңыз, толығырақ: Кассир нөмірі мен өз нөміріңіз.
Бұрыннан тізімде тұрған адамды қайта шақырсаңыз, жаңа жазба қосылмайды — оның рөлі жаңасына ауысады.
Рөлді ауыстыру және қызметкерді жою
Тізімдегі адамның қасынан рөлін өзгертесіз немесе Жою дейсіз. Екеуін де тек owner істей алады.
Жойылған адам сол сәттен бастап ұйымды көрмейді. Оның бұрын жасаған счёттары, кілттері мен әрекеттері жоғалмайды — олар ұйымға тиесілі, адамға емес.
Соңғы иені жоюдан қорғау
Ұйымда кемінде бір owner қалуы керек. Егер соңғы owner-ді жоюға немесе оның рөлін төмендетуге тырыссаңыз, жүйе last_owner қатесімен бас тартады.
Бұл қорғаныс иесіз ұйым пайда болмауы үшін жасалған: иесіз ұйымда кассир қосу, тариф төлеу және қызметкер шақыру мүмкін болмай қалар еді.
Сондықтан иелікті басқа адамға беру реті мынадай:
- Жаңа адамды owner етіп қосасыз (енді ұйымда екі owner болады)
- Содан кейін ескі owner өз рөлін төмендетеді немесе өзін тізімнен алып тастайды
Кері ретпен істеуге болмайды.
Қызметкер жұмыстан кетсе
Мұны кейінге қалдырмаңыз — бір отырыста бітіріңіз:
- Тізімнен алып тастаңыз. Кабинетке кіре алмайтын болады.
- Ол жасаған API кілттерді жойыңыз. Кілт адамға емес, ұйымға тиесілі: адамды жойсаңыз да, кілт жұмыс істей береді. Тізімді қарап, оның кілттерін жойып, орнына жаңасын жасаңыз — API кілттер.
- Webhook құпияларын ауыстырыңыз, егер ол адам оларды көрген болса.
- Telegram чаттарын тексеріңіз. Оның жеке чаты байланысып тұрса, ажыратыңыз.
- Kaspi кассирінің нөмірі сол адамдікі болса — кассирді ауыстырыңыз. Бұл ең маңыздысы: нөмір кеткен адамда қалса, ол сол нөмірмен Kaspi Pay-ге кіріп, байланысты үзіп тастай алады.
Жиі қойылатын сұрақтар
Қызметкер саны шектеулі ме? Тізімдегі адам саны бойынша шектеу қойылмаған.
Бір адам бірнеше ұйымда бола ала ма? Иә. Рөлдер әр ұйымға бөлек беріледі: бір жерде owner, екіншісінде manager болуы мүмкін. Толығырақ: Бір аккаунтта бірнеше ұйым.
Шақырылған адамға хабарлама келе ме? Ол кабинетке кірген сәтте ұйымды тізімнен көреді. Оған нөмірімен кіру керегін өзіңіз айтып қойған дұрыс.
Manager API кілтті көре ала ма? Жоқ. Кілттер бөлімі manager үшін мүлде жабық. Кілт керек болса — developer рөлі керек.
Кім не істегенін көруге бола ма? Иә, әрекеттер журналы бар, бірақ оны тек owner көреді.