Қысқаша
Жүйеде үш түрлі нөмір бар және оларды шатастыру — жаңадан бастағандардың ең жиі кездесетін қатесі. Жеке нөміріңіз кабинетке кіру үшін. Кассир нөмірі — Kaspi Pay-де «Кассир» рөлі берілген, бөлек SIM-дегі нөмір. Клиент нөмірі — телефонға счёт жібергенде қолданылады. Ең бастысы: өз нөміріңізді кассир қылмаңыз, себебі кассир нөмірімен Kaspi Pay қосымшасына кіруге болмайды.
Үш нөмір
| Жеке нөміріңіз | Кассир нөмірі | Клиент нөмірі | |
|---|---|---|---|
| Не үшін | Кабинетке кіру, хабарламалар | Kaspi-де счёт шығару | Телефонға счёт жіберу |
| Қайда енгізіледі | https://qut.kz/app кіру бетінде | Кабинет → Kaspi → байланыстыру | Счёт жасағанда customer.phone |
| Kaspi Pay-де рөлі | Иесі немесе басқа рөл болуы мүмкін | Тек «Кассир» | Ешқандай, ол сіздің клиентіңіз |
| Kaspi Pay қосымшасына кіруге бола ма | Иә, әдеттегідей | Жоқ — сессия үзіледі | Клиенттің өз ісі |
| Кімге көрінеді | Тек сізге | Клиентке (Kaspi көрсетеді) | Тек сізге |
| SMS келе ме | Кіру кодын алғанда | Байланыстырғанда | Счёт туралы push |
| Пішімі | Кез келген өз нөміріңіз | Нақты SIM, SMS қабылдайтын | 7XXXXXXXXXX |
Жеке нөміріңіз
Кабинетке нөмір арқылы кіресіз — пароль жоқ. Кіру коды WhatsApp арқылы, Telegram арқылы немесе SMS-пен келеді.
Бұл нөмір — сіздің әдеттегі жұмыс нөміріңіз. Kaspi Pay-де сіз иесі болсаңыз да, басқа рөлде отырсаңыз да, оған ешқандай шектеу жоқ: Kaspi қосымшасын қалағаныңызша ашасыз.
Жиі кездесетін қате: кабинетке кассир нөмірімен кіруге тырысу. Кабинет ол нөмірді танымайды немесе бос кабинет ашылады — өйткені ұйым сіздің жеке нөміріңізге тіркелген. Өз нөміріңізбен кіріңіз.
Кассир нөмірі
Бұл — Kaspi Pay-де «Кассир» рөлі берілген бөлек нөмір. Оны Kaspi Pay қосымшасында (веб-кабинет емес) Настройки → Сотрудники → Добавить сотрудника арқылы қосасыз, рөлі «Кассир» болуы керек.
Нөмірге үш шарт қойылады:
- Нақты SIM, SMS қабылдайтын. Виртуалды нөмір, IP-телефония жарамайды.
- Нөмір иесінің ЖСН-іне Kaspi Pay-де ЖК немесе ЖШС тіркелмеген болуы керек. Әйтпесе Kaspi SMS орнына пароль мен видеоверификация сұрайды, оны өту мүмкін емес. Иесі кәмелетке толған болуы керек.
- Нөмірде тек «Кассир» рөлі. Басқа рөлдер болса өтпейді.
Оған қоса SIM белсенді болып тұруы керек: оператор нөмірді өшіріп тастаса, байланыс жұмысын тоқтатады.
Жиі кездесетін қате: кассир нөмірімен Kaspi Pay қосымшасына кіру. Kaspi бір кассирге бір ғана белсенді құрылғыға рұқсат береді, сондықтан ол нөмірмен қосымшаға кірген сәтте біздің сессия үзіледі де, счёт шығару тоқтайды: Кассир байланысы үзілді.
Тағы бір нәрсе: кассир нөмірі клиентке счёт туралы хабарламада көрінеді. Бұл Kaspi-дің қалыпты жұмысы, жасыруға болмайды.
Клиент нөмірі
Телефонға счёт (kind: "phone") шығарғанда клиенттің нөмірі керек — Kaspi сол нөмірдегі Kaspi қосымшасына push жібереді. Пішімі: 7XXXXXXXXXX.
Жиі кездесетін қате: клиент нөмірінің орнына кассир нөмірін немесе өз нөміріңізді жазу. Сонда счёт өзіңізге келеді де, клиент ештеңе көрмейді.
Екінші қате: клиентте Kaspi қосымшасы жоқ немесе ол нөмірге тіркелмеген. Мұндайда телефонға счёт жетпейді — QR немесе төлем сілтемесін беріңіз.
Неге өз нөміріңізді кассир қылуға болмайды
Себебі бір-ақ, бірақ ол шешуші: кассир нөмірімен Kaspi Pay қосымшасына кіруге болмайды.
Өз нөміріңізді кассир қылсаңыз, Kaspi Pay-ді ашқан сайын байланыс үзіледі. Ал сіз оны күнде ашасыз: түскен ақшаны көру үшін, есеп айырысуды тексеру үшін, басқа операциялар үшін. Нәтижесінде счёт шығару күніне бірнеше рет тоқтайды, әр жолы қайта байланыстыруға тура келеді, ал арасында клиенттер төлей алмай қалады.
Оның үстіне екінші шарт жиі бөгет болады: Kaspi Pay-де ЖК немесе ЖШС тіркелген ЖСН-нің иесі болсаңыз (әдетте бизнес иесі дәл солай), Kaspi сіздің нөміріңізден SMS орнына пароль мен видеоверификация сұрайды. Оны өту мүмкін емес, яғни байланыстыру сәтсіз аяқталады.
Дұрыс шешім: бөлек SIM алыңыз. Ол нөмір тек осы жұмыс үшін болсын, ондағы телефонды ешкім қолданбасын, Kaspi Pay қосымшасын оған орнатпаңыз.
Кімнің нөмірін алуға болады
- Бос SIM сатып алу — ең қарапайым әрі сенімді жол.
- Қызметкердің нөмірі — болады, бірақ екі шарт: оның ЖСН-іне ЖК/ЖШС тіркелмеген болсын және ол адам Kaspi Pay-ді ашпауға келіссін. Ол жұмыстан шықса, кассирді ауыстыруға тура келеді.
- Отбасы мүшесінің нөмірі — техникалық тұрғыдан болады, бірақ дәл сол тәуекел: біреу Kaspi Pay-ді ашса, байланыс үзіледі.
Кассир байланысы үзілгенде бірден білу үшін Telegram ботын қосыңыз: Telegram ботын қосу.
Жиі қойылатын сұрақтар
Кассир нөмірімен жеке Kaspi қосымшасын пайдалануға бола ма? Жеке Kaspi (банк қосымшасы) мен Kaspi Pay (бизнес қосымшасы) — екі бөлек нәрсе. Ашпау керегі — Kaspi Pay.
Бір нөмірді екі ұйымға кассир қылуға бола ма? Кассир Kaspi-дегі нақты бір ұйымға байланады. Әр ұйымға өз кассирін қосқан дұрыс, әйтпесе счёттар басқа ұйымның шотына түсуі мүмкін.
Кассир нөмірі клиентке көрінбей тұрсын десем? Мұны өзгерту мүмкін емес, оны Kaspi көрсетеді. Сол себепті ол нөмір жеке нөміріңіз болмағаны жөн.
Кабинетке кассир нөмірімен кіріп көрдім, бос кабинет шықты. Неге? Ұйым сіздің жеке нөміріңізге тіркелген. Сол нөмірмен кіріңіз.
Кассир нөмірін ауыстырсам, API кілттерім өзгере ме? Жоқ. Кілттер мен webhook баптаулары сол күйі қалады. Кілт нақты кассирге байланған болса ғана, оны жаңа кассирге қайта байлау керек.